Kreml kontrolindeki Qırım ükümetiniñ reisi Sergey Aksenov bazarertesi künü, aprelniñ 29-ını, bazar künü, aprelniñ 28-nde, qayd etilecek hristianlarnıñ Pasha bayramı munasebetinen raatlıq künü olaraq ilân etti.
İşbu buyruq Qırım ükümetiniñ saytında derc etildi.
Rusiyeniñ «Baar ve emek künü» qayd etilgeni munasebetinen Qırımda beş kün daa – mayısnıñ 1-nden 5-ne qadar raatlıq künü olaraq ilân etildi. Mayısnıñ 9-ı ve 10-u da Rusiyeniñ «Zafer bayramı» munasebetinen tatil oldı. Çarşenbe künü, mayısnıñ 8-nde, iş künü bir saatqa qısqartılacaq.
Ukrainada Pasha pravoslav bayramı munasebetinen aprelniñ 29-ı raatlıq künü olacaq.
Şarqiy hristianlar bazar künü, aprelniñ 28-nde, Pasha bayramını qayd etecek.
Ukraina Yuqarı Radası 2014 senesi fevralniñ 20-ni Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey.
