Qırımda keçken künü 253 koronavirus hastası qayd etildi, 9 kişiniñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov.
«181 hasta tibbiy yardım içün muracaat etkende qayd etildi, 72 insan daa evel qayd etilgen hastalarnen alâqada oldı. Bir künde 69 kişi tüzeldi, bütün müddet devamında 23 685 insan yahşı oldı», – dep bildire Aksenovnıñ aytqanlarını onıñ matbuat hızmeti.
Qırımnıñ Rusiye sağlıq nazirliginiñ malümatına köre, keçken künü 8 hasta koronavirustan vefat etti, pandemiya vaqtında Qırımda bu yuqunçtan vefat etkenlerniñ sayısı 654 oldı.
«3805 insan (covid) ambulator tedaviylevde, 2954 kişi (covid ve pnevmoniya) hastahanelerde buluna, observatorlarğa alınğanlar yoq. Umumen 29762 COVID-19 hastası qayd etildi», – dep aytıla müessise haberinde.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
