Moskva kontrolindeki Qırım yolbaşçısı Sergey Aksenov keçken künü yarımadada koronavirusqa oğrağan 105 yañı hasta aqqında bildirdi. Bu aqta o, «VKontakte» saifesinde yazdı.
«İyünniñ 3-nde Qırım Cumhuriyetinde 105 koronavirus hastası qayd etildi, 13-üniñ hastalıq alâmetleri yoq. 75 hasta tibbiy yardım içün muracaat etkende qayd etildi, 29 kişi daa evel qayd etilgen hastalarnen alâqada oldı, 1 hasta çetelden keldi», – dep aytıla haberde.
İyünniñ 3-nde Sergey Aksenov Qırımda bir künde 101 koronavirus hastası qayd etildi, dep bildirgen edi.
Qırımnıñ Rusiye sağlıq nazirliginiñ malümatına köre, bir kün evelsi Qırımda koronavirusqa oğrağan 5 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
