Keçken künü işğal etilgen Qırımda 10 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
Onıñ malümatına köre, 7 hasta epidemiologik tahqiqat ve laborator skriningi neticesinde qayd etildi, 3 insan alâmetleri bar olğanından. muracaat etti. Qayd etilgen hastalardan 2-si qomşu Rusiyeden keldi.
«Bütün hastalar yuqunç hastahanelerine alındı, alâqada olğanlar belli, profilaktika tedbirleri keçirile», – dep yazdı Aksenov Facebookta.
Umumen Qırımda, akimiyetniñ malümatına köre, 623 yañı koronavirus hastası qayd etildi. 36-sı çetelden keldi, 93-ü qomşu Rusiyeden kelgenler ve olarnen alâqada olğanlar. 416 insan yahşı oldı, 21 kişi vefat etti. Aqyarda 207 insan yañı koronavirus yuqunçına oğradı, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
