Qırım ve esas Ukraina arasındaki memuriy sıñırnıñ «Çonğar», «Kalançak» ve «Çaplınka» keçiş noqtalarında Rusiye işğal etken yarımada sakinleriniñ bozulğan aqlarını qorçalav aqqında malümat ile stendler qoyuldı. Bu aqta Qırım Muhtar Cumhuriyetiniñ Prokuraturası haber ete.
«Sıñırdan keçken vatandaşlar aşağıdaki malümat ala bile: işğalci akimiyet vekilleriniñ cinayet olaraq tasnif etilgen insan aqlarını bozuvları; vatandaşlarnıñ cinayet aqqında ariza bere bilecek ya da uquqiy yardım almaq içün muracaat ete bilecek prokuratura, uquq qoruyıcı organları, bedava uquqiy yardım merkezleri ve ükümetten tış aq qorçalayıcı teşkilâtlarınıñ bağ malümatları», – dep bildirdi prokuratura.
Haber etilgenine köre, leyha Qırım Muhtar Cumhuriyetiniñ prokuraturası ve Ukraina Adliye nazirligi ve aq qorçalayıcı teşkilâtları tarafından başlatıldı.
2018 senesi iyül ayında QMC Prokuraturası işğal altındaki yarımada sakinlerini haberdar tutmaq içün Telegramda resmiy kanal açtı, çünki Qırımnıñ Rusiye akimiyeti qırımlılarnıñ prokuratura saytına kirişini blok ete.
QMC Prokuraturası Rusiye işğali altındaki Qırımda insan aqlarınıñ bozulğanını haber etmek içün isimsiz bildirüv hızmetlerini açqan edi – saytta elektron anketa ve Skype vastasınen video bağı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
