Rusiye baş nazir muavini Marat Husnullin Qırımda iş ziyaretinen bulunıp, yarımada «yaqın yıllarğa suvnen temimn etildi», dep işandırdı.
«Yapqan işlerimiz bu yıl ve yaqın yıllar içün problemni yoq eter, dep tüşünemiz. Amma suv qıdırmağa mıtlaqa kerek», – dep bildire Husnullinniñ aytqanlarını TASS agentligi.
Husnullin mayısnıñ 3-nden berli Qırımda buluna. Yarımadada olıp, o, yaznıñ başında yarımadanı tehnik suvnen temin etmek içün quyular qazılacaq, dep ilân etti. Mayısnıñ 5-nde o, Aqmescit sakinlerini suvnen temin etmek içün devam etken Beşterek-Zuya suv borusınıñ qurucılığını baqtı.
Rusiye prezidenti Vladimir Putin Qırımğa yaqın Azaq deñizi altındaki suvlarnıñ yeterli yedekleri bar, dep aytqan edi. Bundan soñ Qırımnıñ Rusiye yolbaşçısı Sergey Aksenov mütehassıslar Azaq deñizi altındaki içme suvunı çıqaruv imkânlarını baqmaq içün işke başladı, dep bildirgen edi.
Ukraina agrar ilimleri milliy akademiyasınıñ suv ve melioratsiya meseleleri institutınıñ müdir muavini Mihail Yatsük Qırımda içme suvu qıtlığı bu yıl daa beter ola bile, dep qayd etti.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
