Qırım ve Aqyarnıñ Rusiye işğaline qarşı tirenüv kününde yarımada ve Herson ile memuriy sıñırda Ukraina ve qırımtatar bayraqlarını yelpirettiler. Bunı Ukraina Ombudsmeni öfiiniñ matbuat hızmeti haber etti.
Haber etilgenine köre, devlet ve qırımtatar bayraqlarınen daa avtoyürüş keçirilgen. Şu yerde tedbir iştirakçileri memuriy sıñırğa cayav ketken ve anda sabıq siyasiy mabüsler Edem Bekirov ve Yevgeniy Panov Ukraina ve qırımtatar bayraqlarını kötergenler.
“Bugun biz Qırımnıñ işğaline qarşı tirenüv kününini qayd etemiz, amma tirenüv devam ete ve Qırım azat etilmegence devam etecek. Ombudsmen ofisi daima vtandaşlarımıznıñ aqları bozulğanını qayd ete. Bu ukrain ve qırımtatar tillerinde tasil alma yasağı, yarımadanıñ arbiyleştirilüvi, siyasiy ve diniy sebeplerden vatandaşlarımıznıñ taqip etilüvi, söz serbestliginiñ yasağı. Amma Qırım işğalden azat etilgen soñ, vatandaşlarımıznıñ bozulğan aqlarını ğayrıdan tikleycekmiz”, – dedi Ukraina osbudsmeniniñ temsilcisi İrina Verenga.
Qırım ve Aqyarnıñ işğalge qarşı tirenüv kününide Hersonda merkeziy meydanda qırımtatar halqınıñ bayrağını köteridiler.
Fevralnıñ 26-nda Qırım MC ve Aqyarnıñ Rusiye işğaline qarşı tirenüv kününde Ukraina TİN halqara toplulığını Rusiyege qarşı siyasiy ve sanktsiyalar tazyığını quvetleştirmege davet etti.
Ukraina Yuqarı Radasınıñ insan aqları vekâletlisi Lüdmila Denisova feralnıñ 26-nda Qırım MC ve Aqyar şeeriniñ işğaline qarşı tirenüv kününde, Qırımnıñ qaytarıluvı oğrunda küreş devm ete, dep qayd etti.
Amerikanıñ Devlet kâtibi Entoni Blinken, ABD Rusiyeni Qırımnıñ işğalini toqtatmağa çağırğanını bildirdi.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
