Ukraina topraq bütünligi, suvereniteti ve mustaqilligine zarar ketirgen areketler sebebinden kirsetilgen Avropa Birligi sanktsiyaları al-azırda 177 şahıs ve 48 teşkilâtqa qarşı çalışa. Bu aqta AB Ukraina temsilciliginiñ saytı haber ete.
«Olar (sanktsiyalar – QA) kiriş yasaqları ve aktivlerniñ buzlatılmasınen bağlıdır. Sanktsiyalar cedveline kirsetilgen şahıslarnıñ Avropa Birligine kirişi ya da andan tranzit ketmesi yasaqlana. Aynı vaqıtta, aktivlerniñ buzlatıluvı em şahıs, em teşkilâtlarnıñ para ve iqtisadiyat resurslarınen bağlı. Bundan ğayrı, Avropa Birligi vatandaşları ve şirketlerine cedvelde olğan şahıslarğa sermiya bermege yasaq etile», – dep aytıla haberde.
Avropa Birligi, Rusiyeniñ qanunsız Qırım ve Aqyar ilhaqını qabul etmey, dep hatırlata.
«AB halqara uquqnıñ Rusiye tarafından bozuluvını takbih etmege devam ete. Avropa Birligi Ukraina topraq bütünligi, suvereniteti ve mustaqilligine qol tutmaqta qararlı olıp qala», – dep bildirdi AB.
Sentâbrniñ 2-nde AB Şurası Avropa Birliginiñ fikirince, Ukraina topraq bütünligi ve suverenitetini bozğan şahıs ve teşkilâtlarğa qarşı şahsiy sanktsiyalarğa Keriç köprüniñ qurucılığı ile alâqası olğan eki şahıs ve dört şirketni qoşmağa qarar aldı.
Yañı sanktsiyalar cedveline Aleksandr Ganov, «Grand Servis Ekspress» baş müdiri, ve Leonid Rıjenkin, «Straygazmontaj» şirketiniñ infrastruktura leyhalarınıñ baş müdir muavini, kirgenler. Sanktsiyalarğa «Lenpromtransproyekt», Direktsiya po stroitelstvu jeleznoy dorogi Berkakit-Tommot-Yakutsk tren Yolunı quruv direktsiyası, Qırım tren yolu, Qırımnıñ ilk sigorta şirketi oğradılar.
Ukraina Tış işler naziriniñ birinci muavini Emine Ceppar AB daimiy vekiller komitetine Ukraina topraq bütünligini ve suverenitetini bozuv, hususan Keriç köprü qurucılığı ile bağlı şahıs ve teşkilâtlar cedvelini kenişletmek qararını qabul etkeni içün teşekkürler bildirdi.
AB elçileri Keriç köprüniñ qurucılığı içün eki şahıs ve dört şirketke qarşı sanktsiyalarnı tasdıqladı.
İyünniñ 18-nde Ukraina Tış işler naziri Dmıtro Kuleba bildirgenine köre, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ yarımada işğaline cevap olaraq kirsetildi. O vaqıttan berli bir qaç kere uzatılıp kenişletilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
