Gece işğal etilgen Qırım ve Aqyar uçucısız uçaqlarnıñ ücümine oğradı, ava telükesi ilân etildi, Rusiye ava mudafaası çalıştı, ücüm neticesinde Aqmescitte patlavlar ve yanğın aqqında haber etile.
"Krımskiy vetr" telegram kanalı öz abunecilerine atıf eterek bildirgenine köre, Qırım üzerinde birinci pilotsız uçaqlar gece yarısında körünip başlağan. İlk patlavlar Aqmescitte tahminen saat 00:20-de oldı, bazıları pek gürültülü edi. Aqmescit ve Aqmescit rayonı üzerinde Rusiye ava mudafaası çalıştı. Aqmescitte ücüm vaqtında GRES rayonında küçlü yanğın çıqtı.
"Krımskiy veter" haber etkenine köre, gece devamında patlavlar Seyitler ve Qurman rayonlarında ve Novofedorovkadaki "Saki" uçaq alanı yanında eşitildi. Aqmescit rayonınıñ Sarabuz qasabası civarında patlavlar oldı.
Qırımnıñ Rusiye yolbaşçısınıñ yardımcısı Oleg Krüçkov gece ve saba Qırım üzerinde Rusiye ava mudafaasınıñ sistemaları çalışqanını ilân etken edi.
Ukrayina arbiyleri bu malümatnı izaatlamadı.
Qırım.Aqiqat muarririyeti cenk areketleri şaraitlerinde bu malümatnı teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.