Qırım işğaliniñ ekologik aqibetleri meselesi Qırımnı işğalden qurtaruv halqara meydançığı – Qırım platformasınıñ – diqqat fokusında olacaq. Bu aqta Ukraina Tış işler nazirligi noyabrniñ 6-nda Dünya cenk ve silâlı zıddiyetler vaqtında tabiatnı qullanuvnıñ ögüni aluv kününde bildire.
«Yedi yıldan berli Donbasta Rusiye silâlı istilâsı ve vaqtınca Qırım işğali devam ete. Şunıñ içün bu meseleni halqara teşkilâtlarnıñ kün tertibinde tutamız, ve devletlerni bu saada halqara normalarnı yerine ketirmesine çağıramız», – dep aytıla haberde.
Ukrainanıñ teşebbüsinen 2016 ve 2017 seneleri BM Assambleyası eki tabiat qararını qabul etti, bular «Silâlı zıddiyetler olğan rayonlarda tabiatnı qoruv» ve «Silâlı zıddiyetler ve terrorizmden zarar körgen rayonlarda tabiat kirletilüvini yımşatuv ve sıñırlav». Bir çoq eyyet ve ükümetten tış teşkilât olarnı bu saada çerçiveli dep saya.
Haber etilgenine köre, Ukraina BM halqara uquq komissiyasınıñ silâlı zıddiyetler sebebinden tabiatnı qoruv esaslarını azırlamasına qoşula.
Berilgen malümatqa köre, Ukraina Kyivde «Qırım platforması» teşebbüsini muzakere etmek içün sammit ötkerecek ola. Bir çoq memleket, hususan Türkiye, ABD ve Baltiya memleketleri iştirak etmege meraqlı olğanını bildirdi, Kyiv Rusiyeni de muzakere masasına davet etmege niyetlene.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
