Kreml nezareti latındaki Qırım akimiyeti, «Ukrainanıñ areketlerinden Qırım yarımadasınıñ iqtisadiyatına ketirilgen zararğa» qıymet kesecek mahsus iş taqımını qurdı. Bu gruppa Ukraina mustaqilligini ilân etkeninden Rusiye Qırımnı ilhaq etkenine qadar ketirilgen "zarar"nı sayacaq.
Rusiye haber agentlikleri bildirgeni kibi, taqım salı künü Qırım parlamentiniñ prezidiumınıñ oturışında qurulğan.
Parlament spikeri Vladimir Konstantinov, “zararnı talil etken” gruppanıñ yolbaşçılığını onıñ muavini Yefim Fiks becerecek, dep bildirdi.
Martnıñ 15-nde Devlet Dumasınıñ Şurası ve Qırımnıñ Rusiye parlamenti ve Aqyar ükümetiniñ toplaşuvında Volodin Rusiye Ukrainadan Qırım onıñ terkibinde bulunğan 25 yıl içün ivaz tölemesini talap etmeli, dep bildirdi.
Martnıñ 20-sinde Rusiye Devlet dumasınıñ reisi Vâçeslav Volodin Rusiye parlamentiniñ alt palatasında «Ukrainanıñ areketlerinden Qırım yarımadasınıñ iqtisadiyatına ketirilgen zararğa» qıymet kesecek mahsus işçi gruppa qurulğanını bildirdi.
Ukraina Tış İşler Naziri Pavlo Klımkın Facebookta,Ukraina yarımadağa ketirgen “zararı”nı talil etecek mahsus iş gruppasınıñ tizilüvi aqqında Rusiye Devlet Dumasınıñ qararını, “yañı ğayeler olmağanıñ neticesi”, dep ayttı ve qayd etti ki, Rusiyeniñ bir qaç asırlıq Ukraina işğali içün tazminat, yani zararlarnıñ ödevini talap etmege kimseniñ aqlına ne içündir kelmegen.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
