Terrorizmni maliye etüv maddesine istinaden hayriye işleri içün mahküm etilgen Qırım musulmanı Latifa (Nina) Malahova Rusiye cezahanesinden azat etildi. Bu aqta aq qoruyıcı ve jurnalist Lutfiye Zudiyevanıñ malümatına esaslanıp, "Qırım birdemligi" haber ete. 2021 senesi Rusiye mahkemesi Malahovnı dört yıl ve altı ay cezahanede qalmasına üküm etken edi.
Haber etilgenine köre, Malahova cezasını tolusınen Krasnodar ülkesiniñ Dvubratskoye köyündeki 3-nci nomeralı ceza cezahanesinde keçirdi. Qırım musulman qadını şimdi evde, Aqmescit şeerinde kirağa berilgen dairede, apiske alınğan vaqıtta anasınıñ soy-soplarında qalğan qızınen beraber buluna.
"Birinci bir buçuq yıl pek ağır keçti. Buña alışmaq içün em maneviy, em de fizikiy ceetten qıyın edi. Soñra özümni idman, oquv, sağlıqlı beslenüvnen ayatta tutmağa başladım. Amma sağlığım ep bir yaramay", — dedi Latifa Malahova.
O, apis müddeti devamında 12 kilogramm azğanını qayd etti, aşqazan problemleri, devamlı baş ağrıları ve muvazenetiniñ zayıflaşqanını qayd etti.
Eki kere Malaxova iş yerinde namaz qılğanı içün ŞİZOğa tüşken. Amma soñra o, teneffüs vaqtında dua etmege izin berilmesi içün cezahane memuriyetinen añlaşıp olğan.
Latifa Malahovanıñ aqayı, Ruzil Yapparov, alâ daa apiste buluna.
2021 senesi kiçik aynıñ 15-nde qırımlı musulman Latifa (Nina) Malahova aqayı Ruzil Yapparovnen beraber Qazanda tutuldı. Çiftni yañı doğğan qızı Melissa ile beraber FSB hadimleri uçaqnen Qırımğa yollağan ediler.
2021 senesi oraq ayında Rostov-na-Donu şeeriniñ Cenübiy okrugınıñ arbiy mahkemesi Malahovnı "hayriye teşkilâtı adı altında terroristik teşkilât içün para toplağanında" qabaatlap, dört yıl altı ayğa apiske alğan edi.
