Rusiyeniñ nezaretinde olğan Aqyarnıñ Lenino rayon mahkemesi qırımtatar faalleri, «Qırım musulmanları davası»nıñ mabüsleri Rustem Murasov ve Zaur Abdullayevni 2022 senesi fevralnıñ 10-nace tevqifli qaldırdı. Bunı «Qırım birdemligi» cemaat birleşmesi advokat Emil Kurbedinovğa atfı etip bildirdi.
«FSB qırımtatarlarnıñ tevqifli qaldırılması aqqında muracaat etti. Mudafaa tarafı ve mahkemelengenler muracaatnıñ esassız olğanına ve tahqiqat yekünlenmekte olğanına ve qabaatlanğanlarnıñ dava ketişatına tesir etip olamağanlarına atfı etip, itiraz ettiler. Bundan ğayrı, davanıñ siyasiy sebepleri olğanı aqqında sual köterildi», – dep yazıla bildirmede.
Kurbedinovnıñ aytqanına köre, mudafaa tarafı sıñırlama tedbiriniñ ev apsine deñiştirilmesini istegen.
Qayd etilgeni kibi, dava boyunca tahqiqat yekünlengen, yaqın vaqıtta mudafaa tarafı dava materiallarınen tanışacaq. Ekinci "Hizb ut-Tahrir davası" boyunca qabaatlanğanlar Rostov-na-Donuğa etap etilmek kerek.
Avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesiniñ advokat Aleksey Ladinge esaslanıp bildirgenine köre, tutulğan qırımtatarlar «terror teşkilâtını qurğanında ve iştirak etkeninde» şübheli ola.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.