Rusiyeniñ nezaretinde olğan Aqmescitniñ Kiyev rayon mahkemesi «Qırım musulmanlar davası»nıñ mabüsi, imam Raif Fevziyevniñ tevqif müddetini daa üç ayğa uzattı. Bunı «Qırım birdemligi» cemaat birleşmesi advokat Edem Semedlâyevge atfı etip bildirdi.
«Tahqiqatçı, azırlıq tahqiqatını yekünlemege yetiştirmegeni içün tevqif müddetiniñ uzatılmasını istedi, mudafaa tarafı ve mahkemelengen dava materiallarınen tanışmağa daa yetiştirmediler, soñra olarnı prokuraturağa yollamaq kerek, daa soñra Rostov-na-Donudaki Cenübiy bölgeniñ arbiy mahkemesine. Mudafaa tarafı, qanunğa köre insan ev apsinde buluna bilgenine baqmadan ne içün tahqiqat tevqifhanesinde qalmağa mecbur olğanını qayd etip, qarşı çıqtı», – dep yazıla bildirmede.
Semedlâyevniñ sözlerine köre, mahkeme ve tahqiqatçı mudafaa tarafınıñ delillerini körmemezlikke urğan ve kollegiya sıñırlama tedbirini 2 ay 30 künge - 2022 senesi aprelniñ 11-nece uzatqan.
Advokat mahkeme qararını temyiz etecek ola.
Mahkeme oturışı Semedlâyevniñ muracaatına baqmadan qapalı şekilge keçirilgen.
2021 senesi oktâbr ayında Rusiye kontrolindeki Aqmescitniñ Kiyev rayon mahkemesi imam Raif Fevziyevniñ sıñırlav tedbirini 2022 senesi yanvarniñ 13-ne qadar uzattı.
Sentâbrniñ 22-nde Rusiye kontrolindeki Qırım Yuqarı mahkemesi apiske qarşı istinafnı red etip, Raif Fevziyevni SİZOda qaldırdı. İmam izolâtorda tutuv şaraitlerini şikâyet etken edi.
«Qırım birdemliginiñ» malümatına köre, 41 yaşında Raif Fevziyev Aqmescit rayonındaki Mamaq (Strogonovka) köyüniñ imamı ola, medrese bitirdi, nikâh qıydırdı, namaz qıldırdı ve ad qoydı.
2021 senesi avgustnıñ 17-nde saba FSB hadimleri «Hizb ut-Tahrir» edebiyatını tapmaq içün tintüv keçirmege keldi.
İmam ise Rusiye Ceza kodeksiniñ 205.5 maddesine istinaden («Terror teşkilâtınıñ faaliyetinde iştirak etüv») qabaatlanıp tutulğan edi. O künü Kiyev rayon mahkemesi onı apiske aldı.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.