Rusiye akimiyeti tarafından "Qırım musulmanları davası" boyunca mahküm etilgen 36 yaşındaki qırımlı Amethan Abdulvapovnıñ babası, oğlu Angarstaki 2-nci sert rejimli koloniyasında ŞİZO-da tutula, dep bildirdi. Bu aqta Necip Abdulvapov "Qırım birdemligi" cemaat birleşmesine ayttı.
Daa evel, Necip Abdulvapov Rusiye Federatsiyasınıñ Tahqiqat komitetine ariza berip, İrkutsk vilâyetiniñ Angarsk şeerindeki 2-nci sert rejimli koloniyada teşkerüv keçirilmesini talap etkeni aqqında bildirilgen edi.
Amethan Abdulvapovnıñ cezahanede insultqa oğrağanı aqqında oraq ayınıñ 17-nde belli oldı. Erkek, qorantasından yürek içün ilâc yollamasını rica etti, çünki cezahanede tedaviylenmek içün ilâc yoq.
Abdulvapovnıñ aytqanına köre, yürek problemleri, o, daa Çelâbinsk vilâyetiniñ Verhneuralsk apishanesine etap etilmezden evel peyda olğan.
Amethan Abdulvapov 2022 senesi kiçik ayda tintüvlernden soñ tutuldı. O vaqıt Qırımnıñ bir qaç rayonında Rusiye quvetçileri dört insannı yaqaladı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlarnıñ episi Rusiyede terroristik olaraq tanılğan, lâkin dünyanıñ bir çoq memleketiniñ milliy qanunları seviyesinde sıñırlanmağan "Hizb ut-Tahrir" islâm siyasiy firqasında iştirak etkeninde qabaatlandı.
2023 senesi saban ayınıñ 15-nde Rusiye mahkemesi Abdulvapovnı 10 yıl ve 6 ayğa azatlıqtan marum etti.