Qırım Muhtar Cumhuriyetiniñ prokuraturası Rusiyeniñ Qırım işğali vaqtında qırımtatar faali Reşat Ametovnı öldürgen şahıslarnı taptı.
Bu aqta müessiseniñ matbuat hızmeti sentâbrniñ 10-nda bildirdi.
«Reşat Ametovnı Ukraina Anayasası ve qanunları tışında qurulğan «Samooborona Krıma» adlı silâlı birleşmeniñ eki iştirakçisi hırsızlağanına dair yeterli delil keçirilgen mahkemeden evel tahqiqat vaqtında elde etildi. Ametovnıñ hırsızlanuvı 76-ncı ava-desant diviziyası ve Rusiye Silâlı quvetleriniñ 728-inci ayrı bağ batalyonında arbiy azırlıq körgen Rusiye Silâlı quvetleriniñ sabıq arbiyi S. reberligi altında «Samooborona Krıma» iştirakçileri tarafından kerçekleştirildi. Arbiy pensioner», – dep aytıla haberde.
Prokuraturanıñ malümatına köre, qayd etilgen cinayetten soñ şübheli kişi Qırım Muhtar Cumhuriyetini terk etip, «DNR» terror teşkilâtı erkânında cenk areketlerinde iştirak etti ve 2014 senesi aprel ayında Ukraina telükesizlik hızmetiniñ «Alfa» mahsus bölüginiñ üç zabitinen bağlı aynı cinayet işledi.
Haber etilgeni kibi, avgustnıñ 22-nde adı aytılmağan üç şahısqa Ukraina Ceza kodeksiniñ 260-ıncı maddesiniñ 2-nci qısmı (qanun tışında silâlı birleşme faaliyetinde iştirak etüv) ve Ukraina Ceza kodeksiniñ 146-ncı maddesiniñ 3-ünci qısmına (ağır aqibetlerge ketirgen gruppa insanlarnıñ añlaşması ile insannı qanunsız şekilden azatlıqtan marum etüv) istinaden şübheli sayılğanları bildirildi. Şübheliler halqara qıdıruvğa ilân etildi.
2014 senesi martnıñ 3-nde saba Aqmescitniñ Maryino qasabasında yaşağan üç balanıñ babası, 39 yaşında Reşat Ametov evden çıqqan edi. Tuvğanlarına arbiy komissarlıqqa barıp, Ukraina ordusınıñ göñüllileri sırasına yazılacağını ayttı. Video kameraları onı, Rusiyeniñ Qırım işğaline qarşı Lenin meydanında Qırım ükümetiniñ binası ögünde bir kişilik narazılıq keçirgen kişini, qayd etti. Videoda körüne ki, Qırım «samooboronasınıñ» bir qaç vekili onı meydanda tutıp, maşinağa mindire. Eki aftadan soñ Reşat Ametov Qarasuvbazar rayonınıñ Ortalan (Zemlâniçnoye) köyü yanındaki tarlada ölü tapıldı. Erkekniñ cesedinde işkence izleri bar edi, başı şeritnen sarılğan edi, yanında ise qırçma tapılğan edi. Daa soñra çıqarılğan neticelerge köre, ölümniñ sebebi közüne saplanğan pıçaq yarası oldı.
Moskvanıñ kontroli altında bulunğan Qırım akimiyeti qırımtatar faalini elâk etkenleriniñ tapılması içün mukâfat berecegini vade etti. Lâkin faalniñ qatilleri ale daa tapılmadı.
2017 senesi Ukraina prezidenti Petro Poroşenko 2014 senesi baarde öldürilgen qırımlı Reşat Ametovğa Ukraina Qaramanı unvanını berdi.
Poroşenko Reşat Ametovnı «qırımtatar halqınıñ cesür oğlu, Ukrainağa ait Qırımsız yaşayışını tasavvur etip olamağan insan» dep adlandırdı.
