QMC prokuraturası Qırımtatar faali, Bütündünya Qırımtatar kongressiniñ icra komitet azası Ervin İbragimovnıñ ğayıp oluvını tahqiq etmege devam ete, onı 10 yıl evelsi Bağçasarayda belgisiz şahıslar alıp ketti. Bu aqta Qırım.Aqiqatqa müessise haber etti .
Ervin İbragimovnı em Ukrayinada, em de onıñ tışında İnterpol yardımınen qıdıralar.
"Biz soy-soplarından biologik örneklerni alıp, molekulâr-genetik ekspertizanı keçirdik. Ervin İbragimovnıñ babasınıñ DNK-profili Ukrayinada Merkeziy genetik malümat esaplav bazasına berildi. Eşleşmeler tapılsa, bu malümat bu bazada qayd etilecek. Ğayıp olğanlarnıñ bulunğan yerini tapmaq içün İnterpolğa sarı ilân da yolladıq. Bundan ğayrı, Ervin İbragimovnıñ biologik örnekleri anda yollanıldı", — dep aytıla QMC prokuraturasında.
Müessisede qayd eteler ki, Ervin İbragimovnıñ 2016 senesi Quralaynıñ 24-nde Bağçasarayda Rusiye yol-naqliyat hızmetine kiyingen eki belgisiz şahıs tarafından alıp qaçılğanını qayd etken kamera videosını ögrendiler ve diqqatqa alalar.
Qırım Muhtar Cumhuriyetiniñ prokuraturası Ervinniñ ğayıp oluvı boyunca tahqiqatında Rusiye quvetçilerinden alınğan malümatnı da köz ögüne ala, amma Qırım territoriyasında olarnıñ qanuniyligini tanımaylar. Müessisede qayd eteler ki, elde etilgen vesiqalar "Rusiye quvetçileri Ervin İbragimovnı tapmaq içün bir şey yapmağanını" köstere.
Ervin İbragimov 2016 senesi Quralaynıñ 24-nde hırsızlanğan edi. Nezaret kameralarından alınğan malümatqa köre, Rusiye yol polisi urbasında eki belgisiz şahıs onıñ maşinasını Bağçasarayda toqtattı, mikroavtobusına mindirip, belli olmağan yerge alıp ketti. O vaqıttan berli onıñ bulunğan yeri belli degil.