İlhaq etilgen Qırım memuriy sıñırda tutulğan “Qırım birdemligi” faalcilerini yiberdiler.u aqta “Qırım birdemligi” cemiyet birleşmesi Facebookta bildire.
Remzi Bekirov, faalcileriniñ birisi, vesiqa teşkerüvinden soñ onı ve Ruslan Süleymanovnı vagonğa oşağan, içinde eki qatlı yataq olğan binağa alıp bardılar.
“Devamlı beklemelerden soñ FSB hadimleri Remzini sorğuğa çekti, onda oña belli olğan diniy teşkilâtlar aqqında soradılar. Bir çoq vaqıt keçkeninden soñ faalcilerniñ ekisi de yiberildi”, - denile beyanatta.
Martnıñ 26-nda saba Qırımnıñ memuriy sıñırında Rusiye sıñırcıları «Qırım birdemliginiñ» faalleri Remzi Bekirov ve Ruslan Suleymanovnı tutıp aldı. Bu aqta Bekirovnıñ ömür arqadaşı Halide haber etti.
Berilgen malümatqa köre, tutulğan faallerniñ «kimlik vesiqaları sıñır hızmeti hadimleriniñ şübhesini doğurğan eken».
«Qırım birdemliginiñ» bildirgenine köre, 2017 senesi fevral ayında ekisi de Marlen Mustafayevniñ evi yanında tutulıp, mahküm etilgen ve qanunsız mitingde iştirak etkeninde qabaatlanıp, memuriy apis cezasını alğan edi.
Fevralniñ 21-nde faal Marlen Mustafayevniñ evinde tintüv keçirilgen edi. Rusiye uquq qoruyıcıları onı eki yıl evelsi içtimaiy ağlarda paylaşqan Rusiyede yasaqlanğan «Hizb ut-Tahrir» teşkilâtınıñ timsalleri içün tuttı. Bunı videoğa çıqarğan daa 10 qırımtatarı tutulğan edi. Mustafayev 11 künge apiske alındı, qalğanları – 5 künge («qanunsız kütleviy tedbir» sebebinden).
Ukraina Tış işler nazirligi işğal etilgen Qırımda Ukraina vatandaşlarınıñ taqip etilüvinden raatsızlanğanını bir çoq kere bildirip, Rusiyeni yerli sakinlerge basqı yapmamasına, tutulğanlarnı ve siyasiy sebeplerden apiske alınğanlarnı azat etmesine çağırğan edi.
