Rusiye nezaretindeki Qırım Yuqarı mahemesi, Aluşta "Hizb ut-Tahrir davası"nıñ iştirakçileri Ruslan Memetov ve Eldar Kantemirovnıñ sıñırlayıcı tedbileriniñ uzatılmasına qarşı berilgen advokatlarnıñ apellâtsiya şikâyetlerini red etti, dep bildire Qırım.Aqiqat mühbiri.
Böylece, olar 2020 senesi fevral 20-sine qadar SİZOda tutulacaq.
"Noyabr 18-inde Qırım Yuqarı mahkemesi, müşterim Ruslan Mesutovnıñ davasınen bağlı apellâtsiya şikâyetini baqtı. Mahkeme oturışı başlamazdan, o, qapalı sürette keçecegi aqqında haber ettiler. Advokat Ayder Azamatov, protsess açıq keçmesi aqqında muracaatlarnı bere edi. Mahkeme, sadece üküm ilânını açıq yapmağa razı oldı. Mahkeme muzakeresi eki daqqa edi, müşterilerimizniñ soyları ise bu vaqıtta mahkeme odasına kirip yetiştirmedi. Men, müşterimniñ mahkeme odasına ketirilmesini muracaat ettim, amma mahkeme muracaatımnı qabul etmedi, ve Eldar Kantemirov ile müşterim, oturışta SİZOdan video vastası ile iştirak etti. Onıñ içün, nasıldır advokat sırı olğan meselelerni müşterimnen muzakere etip olamadıq. Neticede mahkeme apellâtsiya şikâyetlerimizni red etti", - aytıp berdi advokat Siyar Paniç.
İyün 10-unda Aluşta, Qarasuvbazar ve Aqmescit rayonlaında yapılğan tintüvleden soñ 8 adam yaqalandı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerova, Enver Ömerov, Ayder Cepparov ve Eskender Süleymanov.
Rusiye FSBsi, Rusiye Ceza kodeksiniñ 205.5 maddesiniñ 1-inci qısmına köre tahqiqiy tedbirler yapıla ve diniy «Hizb ut-Tahrir» teşkilatına bağlıdır, dep bildire.
