Ukraina prezidenti Volodımır Zelenskıy, Qırım meselesi kün tertibinden çıqarılmaycaq ve «Donbastaki barışıqnıñ fiyatı» olmaycaq, dep bildirdi. Bu aqta o, fevralniñ 26-nda Kyivdeki Age of Crimea forumında çıqışta bulunıp ayttı.
«Donbastaki cenkni toqtatmaq ve eñ eyi ukrainalılarnı er kün coymamaq içün elimizden kelgenini yapamız. Bütün ğayretimiz bunıñ içün ve Qırım kün tertibinden çıqarılacaq ya da Donbasta, Ukrainada barışıqnıñ fiyatı olacaq demek degil», – dep ayttı Zelenskıy.
Ukraina prezidentiniñ aytqanına köre, «Qırım üzerinde Ukraina bayrağı köterilsin dep» er şey yapılacaq.
«Ukrainalılar yüz fayız birler, Qırımnıñ qaytarıluvı milliy ğayemizniñ şübhesiz qısmıdır», – dep qayd etti Zelenskıy.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
