Qırımda Aqmescitniñ Kiyev rayon mahkemesi ögünde «Qırım birdemliginiñ» faallerine qoltutuv fleşmobında iştirak etken Tair İbragimovğa qarşı memuriy protokol tizildi.
Advokat Emil Kurbedinovnıñ Qırım.Aqiqat mühbirine bildirgenine köre, İbragimovğa qarşı protokol «cemaat tedbirlerini keçirüv nizamını bozğanı içün» (Rusiye Memuriy cinayetler kodeksiniñ 20.2 maddesiniñ 5-nci qısmı) tizildi.
«Olmaycaq bir qabaat, protokol tizilgende bir sıra hata yapıldı. Tair İbragimov oña razı degil, yarın bunı mahkemede añlatacaqmız. Bundan ğayrı, onı zornen rayon bölügine ne maqsadnen alıp ketkenler añlamayım – bu madde boyunca cezada azatlıqtan marum etüv yoq», – dep añlattı Kurbedinov.
Rusiye kontrolindeki Aqmescitniñ Kiyev rayon mahkemesi Tair İbragimovnıñ memuriy davasını martnıñ 29-nda baqacaq. Maddege köre 20 biñ rublege qadar para cezası ya da 40 saatqa qadar mecburiy işler tayin etile bile.
Daa evel belli olğanı kibi, Aqmescitniñ Kiyev rayon mahkemesi martnıñ 28-nde saba Rusiyeniñ Rostov-na-Donu şeerinde Rusiyede yasaqlanğan «Hizb ut-Tahrir» teşkilâtı ile alâqaları bar olğanından şübheli sayılıp tutulğan «Qırım birdemligi» cemaat birleşmesiniñ 3 faalini tevqif etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde Aqmescitniñ Kiyev rayon mahkemesi tutulğan doquz qırımtatarını tevqif etti.
Martnıñ 28-nde Rusiyeniñ Rostov-na-Donu şeerinde Rusiye uquq qoruyıcıları tünevin Qırımda evleri tintilgen «Qırım birdemliginiñ» üç faalini tutıp aldı.
Şu künü Rusiye kontrolindeki Aqmescitniñ Kiyev rayon mahkemesi martnıñ 27-nde Rusiye uquq qoruyıcıları tarafından Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılıp tutulğan 14 qırımtatar faalini apiske aldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
