Kreml kontrolindeki Qırım sağlıq nazirligi qırımlılarğa COVID-19-dan «Sputnik V» Rusiye aşısınen aşılanmaq içün poliklinikalarğa muracaat etmege teklif etti.
Qayd etilgenine köre, aşı olmağa istegen sakinlerniñ adları ilk cedvellerge alınacaq.
«Yañı koronavirus yuqunçından kütleviy aşılanma başlağanı içün aşı yaptırmağa istegen vatandaşlar yaşağan yerlerinde poliklinikağa telefon rejiminde ya da WhatsApp vastasınen muracaat etip, evelden nevbet ala bile», – dep aytıla haberde.
Nazirlik, COVID-19 «Sputnik V» aşısı eki kere «göñülli olğanlarğa» yapıla, dep qayd ete.
Hatırlatamız, bıltır dekabr ayında Qırımnıñ Rusiye yolbaşçısı Sergey Aksenov yarımadada koronavirus yuqunçından kütleviy şekilde aşı yapmağa başlaylar, ilk olaraq tibbiyet hadimleri aşı alacaq, dep bildirgen edi.
Bazı memleketlerniñ Rusiye aşısınıñ keyfiyeti ve tedqiqat doğrulığı şübhe doğura. Meselâ, Türkiye Rusiye aşısını almaqtan vazgeçti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
