Kreml nezaretindeki Qırım akimiyeti, ilhaq etilgen Qırımğa Almaniya parlamenti (Bundestag) ve topraq parlamentlerniñ mebusları kele bilecegini anons etti.
Qırım parlamentiniñ milletlerara munasebetler komitetiniñ reisi Yuriy Gempel ТАSS agentligine bildirgeni kibi, parlament vekilleri, "yarımada vaziyetinen tanışmaq içün", Qırımnı aqımdaki yılnıñ noyabr ayında ziyaret etecek.
"Bizde delegatsiya olacaq, o, Bundestag ve topraq parlamentleriniñ mebuslarından terkip olacaq. Bu, böyle terkipte olğan delegatsiyanıñ ilk ziyareti olacaq. Ziyaret vaqtında Qırım akimiyeti ve cemiyetinen körüşüvler keçirilecek", – ikâye etti o.
Amma Gempel, delegatsiya azalarını ve sayısını aytmadı.
Çetel vatandaşlarını Qırımğa davet etip, yarımdanıñ rusiyeli akimiyeti onıñ ilhaqını qanunlaştırmağa tırışa.
Ukraina Tış İşler Nazirliginde, çetel siyasetçilerniñ Qırım ziyaretlerniñ resmiy statusı olmağanını bildire. TİN, keçken yılnıñ iyül ayında, cetel vatandaşlarnı ve vatandaşlıqsız şahıslarnı, Qırımnıñ qanunsız ziyaretlerinden saqındırğan hitapnı derc etti.
