Kreml kontrolindeki Qırım akimiyeti Donetskke «DNRniñ beş yılına» keldi. Bu aqta yarımadadan kelgen musafirler içtimaiy ağlarda bildire.
Donetskke Qırım yolbaşçısı Sergey Aksenov, Qırım parlamentiniñ spikeri Vladimir Konstantinov, Qırımnıñ sabıq prokurorı ve Rusiye Devlet Dumasınıñ deputatı Natalya Poklonskaya, Rusiye Devlet Dumasınıñ qırımlı deputatı Andrey Kozenko, Rusiyeniñ qırımlı senatorı Sergey Tsekov, Putinniñ işğal etilgen Qırımdaki sabıq vekili Oleg Belaventsev ve digerleri keldi.
Separatist kütleviy haber vastaları bildirgenine köre, Donetsk musafirleri bugün Donetskniñ Kiyev rayonındaki Lenin komsomolı parkında açılğan «DNR ğalebeleriniñ sergisini» ziyaret etti.
Bundan ğayrı, «DNR yolbaşçısı» Denis Puşilin Sergey Aksenov ve Andrey Kozenkonı «Cumhuriyet nişanınen» taqdirledi.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
