Ukrainanıñ suv problemleri ve melioratsiya institutınıñ müdir muavini Mihail Yatsük emin ki, yerastı quyularnıñ qullanıluvı Qırım yarımadasını suvnen temin etmege yardım etip olamaz.
Bu aqta o, Qırım.Aqiqat Radiosınıñ yayınında ayttı.
«Quyularda suv yeterli olsa edi, olarnı çoqtan açıp, er kesniñ ihtiyaclarını qarşılar ediler. Speleolog ve gidrologlarnıñ malümatına köre, bu yerastı yedekleri endi yoqtır. Bu vaziyette prioritet zıddiyeti peyda ola: ya suv ihtiyacları qarşılanacaq, ya da bahçivan, sanayı ve digerleriniñ», – dep qayd etti ekspert.
Qarasuvbazardaki «Skazka» ayvanat bağçası ve «Taygan» arslanlar parkınıñ saibi Oleg Zubkov yarımadada suv yedekleri yetmegeni içün fevqulâde vaziyet rejimi ilân etilmeli degen fikrini bildirdi.
Martnıñ 12-nde Rusiye kontrolindeki Qırım ükümetiniñ reisi Yuriy Gotsanük, suv boru hatları eskirgeni içün yarımadada içme suvunıñ 50 fayızı coyula, dep bildirdi.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Herson vilâyetiniñ devlet memuriyeti, aprelniñ 4-nde Şimaliy-Qırım kanalı toldurıldı ve kanaldan işğal etilgen Qırımğa suv berilmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
