Rusiye quvetçileri qırımtatar faalleri Edem İsmailov ve Bari Bariyevniñ evlerinde tintüv keçire. Bunı "Qırım birdemligi" cemaat birleşmesi haber ete.
"Tüntüvler aqqında haberler altını keçkende kelip başladılar. Bari ile beraber bir azbarda qart anası yaşay. Ekisiniñ de çağına yetmegen balaları bar, olar da şimdi ğaliba ev içindeler", - dep yazıla bildirmede.
Saat 8:30-ta Bariyevniñ evinde tintüv yekünlengen, quvetçiler onı Aqmescitke alıp ketkenler.
"Tintüv bitken soñ Barini silâlı hadimler refaqatında evden alıp kettiler. Episi olıp on adam. Maskalı hadimlerden biri Barini Aqmescitke Franko bulvarına subet içün alıp ketkenlerini ve aqşam o evge qaytacağını ayttı. Tuvğanlarına tintüv protokolını qaldırğanlarını ayttı. Amma tuvğanları protokol qaldırmağanlarını bildirdiler. "Gazel" ve "Ford" nomersiz ediler", - dep qayd etti imayeci Seit-Osman Karaliyev.
Tintüv sebepleri belli degil.
Aprelniñ 25-nde saba saat 7-lerde Cepparovnıñ evinde tintüv olıp keçken edi. Haber etilgeni kibi, tintüv vaqtında evde ömür arqadaşı ve 14 yaşında qızı edi. Tintüvden soñ Rusiye quvetçileri qırımlı cemaatçını yaqalağan edi.
Soñra Rusiye kontrolindeki Qırımnıñ Qarasuvbazar rayon mahkemesi tutulğan qırımtatar uquq qoruyıcısı Abdureşit Cepparovnı «poliske riayet etmegeni» içün 12 künge apiske alğanı belli oldı.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
