Qırımda Rusiye politsiyası ve Esap palatasınıñ hadimleri akimiyetke qol tutqan «Millet» qırımtatar telekanalında tintüv keçirdi. Bu aqta telekompaniyanıñ baş müdiri Lilâ Vecat TASS agentligine bildirdi.
«Bir qaç künden berli İç işler nazirliginiñ hadimleri, Esap palatası çalışa – uquq qoruyıcı organları para nizamını, emek qanunlarına riayet etilgenini teşkere. Uquq qoruyıcı organlarınıñ işi başlağan soñ bir sıra hadim (istifa – QA) arizasını acele berdi», – dedi Vecat.
Onıñ qayd etkenine köre, 19 insan işten boşatıldı ve «uquq qoruyıcı organları bir de bir netice bergen soñ hulâsa çıqarıp olur».
Rusiye kontrolindeki Qırım yolbaşçısı Sergey Aksenov «Millet» hadimlerine yañı reberleri Lilâ Vecatnı taqdim etti.
Bundan evel Vecat «Millette» öz leyhalarını ve haberlerni alıp barğan, daa soñra «Krım 24» telekanalında mühbir olıp çalışqan, ve belli bir vaqıt onıñ Yaltadaki bölügini idare etti.
Fevral ayında «Milletniñ» sabıq baş müdiri Ervin Musayev istifağa çıqtı.
Musayev 2017 senesi iyül ayında Rusiyege qol tutqan «Millet» qırımtatar telekanalınıñ baş müdiri olaraq tayin etildi.
2018 senesi sentâbr ayında Musayev Varşavada OSCE İnsan ölçevi toplaşuvınıñ iştirakçisi olaraq qayd etildi. Ukraina eyyetiniñ vekilleri oña çıqışta bulunmağa bermedi.
«Qırımnıñ Ukraina tarafından qamaçavını» şikâyet etken Musayevniñ lafını Ukraina eyyeti böldi.
O vaqıt Ukraina informatsion siyaseti naziriniñ birinci muavini Emine Ceppar işğal etilgen Qırımdan Musayev ve diger şahıslarnıñ iştirak etüvini Rusiyeniñ Ukrainağa qarşı alıp barğan «gibrid cenkniñ» bir parçası dep adlandırğan edi.
Musayev 2019 senesi de OSCE konferentsiyasına keldi. Rusiye kütleviy haber vastalarına bildirgenine köre, 2019 senesi çıqışta bulunğanda «bir zorluq olmadı».
2015 senesi aprelniñ 22-nde Aksenovnıñ buyruğınen «Millet» adını alğan «Qırımtatar cemaat teleradiokompaniyası» ve «Vetan sedası» radiosı mustaqil ticaretten tış teşkilât qurulğan edi. Avgustnıñ 28-nde Roskomnadzor Qırımtatar cemaat teleradiokompaniyasına «Millet» telekanalı ve «Vetan sedası» radiosınıñ yayınları içün litsenziyanı berdi. 2015 senesi sentâbrniñ 1-nde «Millet» test rejiminde yayınlarına başladı.
