Rusiye politsiyası Qırımnıñ Bağçasaray rayonındaki Foti Sala (Golubinka) qasabasınıñ eki sakinine keldi. «Qırım birdemligi» cemaat birleşmesi bildirgenine köre, uquq qoruyıcılar İslâm Calilov ve Murat Ramazanovdan «malümat aldı».
«Bugün, dekabrniñ 9-nda, añlaşılmağan bir kişinen politsiya hadimleri keldi, yuqlay edim. Anam çıqtı. Soñra uyandım ve telefon etip, çalışammı, maşinam barmı, Moskvağa bardımmı dep soradılar. Bir cedvelde olğanımnı, meni anda körgenlerini aytqanlar, men anda yoq edim. «Barma, iştirak etme, oturğan yerinde otur» degenler», – dedi İslâm Calilov.
Faallerniñ aytqanına köre, politsiya Murat Ramazanovdan iş yeri, yaşağan yeri ve Moskvağa barıp barmağanınen bağlı şahsiy malümat ile izaatname yazmasını talap etti.
«Moskvağa aktsiya, piketlerge bardıñmı yoqmı? Men manasını soradım. Ne demek izaatname? «İzaatname toplaymız. Moskvağa bardıñızmı?» deyler. Men cevap berem – Moskvağa barmadım… Yaşağan yerimni, kimnen yaşağanımnı, qayda çalışqanımnı soradılar. Yanında (politsiya hadiminiñ – QA) daa bir insan bar edi – az laf etken, yaza edi», – dedi Ramazanov.
Qırımdaki Rusiye İç işler nazirligi idaresiniñ saytında vaziyetnen bağlı malümat yoq.
2019 senesi iyülniñ 10-nda Moskva merkezindeki Qızıl meydanda politsiya Qırımdaki repressiyalarğa qarşı narazılıq bildirgen yedi qırımtatar faalini tuttı. Ertesi künü, 2019 senesi iyülniñ 11-nde, Rusiye Yuqarı mahkemesi ögünde 46 kişi tutuldı. Olar qırımtatarlarnıñ kütleviy tutulmasına qarşı narazılıq bildirmek içün Moskvağa keldi. Tutulğanlarğa qarşı Rusiye memuriy bozuv kodeksiniñ 20.2 maddesiniñ 5-inci qısmına istinaden memuriy protokollar tizildi. Daa soñra bütün faaller qabaatlı tanılıp, mahkeme qararınen para cezalarını ödedi.
