Noyabrniñ 12-nde Kyivde keçirilecek VI Qırımtatar Milliy Qurultayınıñ delegatları konferentsiyasına bazı iştirakçiler yarımadada basqı altında olğanı içün işğal etilgen Qırımdan kelip olamaz. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev noyabrniñ 5-nde Qırım.Aqiqat Radiosınıñ yayınında ayttı.
«Sessiya keçirilmesi içün olar (delegatlar – QA) az sayıda olur, dep qorqam. Şu sebepten Qurultay konferentsiyası aqqında laf kete. Keçken sene delegatlar esas Ukrainağa kelip ketken soñ basqığa oğrağan ediler», – dedi Smedlâyev.
Onıñ aytqanına köre, VI Qırımtatar Milliy Qurultayı delegatlarınıñ Qırımda iş problemleri peyda ola bile.
«Biznes, devlet müessiselerindeki iş ile bağlı olğanlar konferentsiyağa kelecek. Añlayım ki, ne ekim, ne oca kelip olamaz, çünki olarğa işte izin bermezler. Oña şartlar qoyulacaq. Çıqtıñmı – işsiz qaldıñ», – dep qoştı o.
Qırımtatar Milliy Meclisi, noyabrniñ 12-nde Kyivde VI Qurultay delegatlarınıñ konferentsiyasını toplay.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
