Kyivde keçirilgen VI çağırılış Qırımtatar Milliy Qurultayınıñ konferentsiyası «Qurultay faaliyetiniñ temelinde olğan printsip ve maqsadlarınıñ bozucılarını» aydınlattı.
Qırım.Aqiqat mühbiriniñ bildirgenine köre, «bozucılar» cedveline Qırımnıñ Rusiye müftisi Emirali Ablayev, em de: Ayder Acimambetov, Seit-Asan Asanov, Elmira Asanova, Eskender Bilâlov, İbragim Bormambetov, Teyfuk Gafarov, Refat Derdarov, Remzi İlyasov, Fevzi Kübedinov, Dilâver Melgaziyev, Zevay Osmanov, Dilâver Reşetov, Zaur Smirnov, Talât Suleymanov, Seydamet Tolipov, Murat Yazıciyev, Ruslan Yakubov kirsetildi.
Qurultay qararınıñ leyhasına binaen, bu şahıslar «Qırımtatar Milliy Qurultayınıñ faaliyeti esasında olğan printsip ve maqsadlarnı bozdı, Qırımtatar Milliy Qurultayı ve Qırımtatar Milliy Meclisiniñ qararlarını yerine ketirmedi ve «Ukrainanıñ vaqtınca işğal etilgen topraqlarında vatandaşlarnıñ aq ve serbestligini ve uquqiy rejimni temin etüv» qanunınıñ maddelerini bozdı, dep bildire Qırım.Aqiqat mühbiri.
Daa evel haber etilgeni kibi, VI çağırılış Qırımtatar Milliy Qurultayı delegatlarınıñ konferentsiyasında delegatlarnı işğal etilgen Qırımda qırımtatar halqınen işni faalleştirmege çağırdılar.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirildi. Tedbirge 200 iştirakçiden ziyade keldi.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
