Noyabrniñ 12-nde Kyivde keçirilgen VI çağırılış Qırımtatar Milliy Qurultayı delegatlarınıñ konferentsiyasında delegatlarnı işğal etilgen Qırımda qırımtatar halqınen işni faalleştirmege çağırdılar.
Bunı Qırım.Aqiqat mühbirine Qırımtatar Milliy Meclisiniñ reis muavini Nariman Celâl bildirdi.
«Qurultay delegatlarını, regional meclis azalarını qırımtatar halqınen iş keçirip, Qırımdaki faaliyetniñ telükesiz ve qolay yollarını tapmağa çağırdılar. Yıllardır açıq-açıq toplaşıp, çeşit meselelerni muzakere etmege alıştıq. ATR telekanalına kelip, on biñlernen vatandaşımızğa muracaat ete edik. Bugün vaziyet bam-başqa. Belki de, qartbabalarımıznıñ malümatnı yetkizüv vastalarına qaytmaq kerekligini er kes daa añlamadı: ayaqmaşina, maşinanı alıp, insanlarğa barıp laf etmek kerek, ev-evden», – dedi Celâl.
Onıñ qayd etkenine köre, Qırımda açıq toplaşuv ötkermek «aman-aman imkânsız ola».
«Cami olsa, imamğa basqı yapıla, qave olsa – saibine. Bizler ise Sovetler Birligi zamanında olğan teşebbüs gruppalarınıñ formatına qaytmağa teklif etemiz. Regional meclis azaları ya da Qurultay delegatlarınıñ episi Qırımdaki işniñ yañı şaraitlerine alışıp olamadı. Formal tarafqa qulaq asmayıp, halqımıznıñ bütün küçüni bulunğan yerlerde birleştirmege teklif etemiz. Küçük bir şey yapqanlar içün bir tevsiye, daa ziyade yapmaq, bir şey yapmağanlarğa ise – eñ azından bir şey yapmaq», – dedi Meclis reisiniñ muavini.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirile. Tedbirge 200 iştirakçiden ziyade keldi.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
