Aprelniñ 20-nde gece ve kün devamında Qırımda avalar bozulacaq: küçlü yağmur yağması ve küçlü yel olması beklenile. Bu aqta Qırımdaki Rusiye Fevqulâde vaziyetler nazirligi tenbiley.
«Suvuq cebe sebebinden aprelniñ 20-nde gece ve saba Qırımda bazı yerlerde küçlü yağmur yağması, kündüz ve kün soñuna qadar şimaliy-ğarbiy yel süratınıñ saniyede 17-22 metrge qadar artması beklenile», – dep aytıla müessise haberinde.
Qurtarıcılar qırımlılarnı avalar bozulğanı içün fevqulâde vaziyet peyda ola bile, dep tenbiley. Bu sebepten Fevqulâde vaziyetler nazirligi balıqçı ve gemicilerni deñizge çıqmaqtan, cumhuriyetniñ sakinleri ve musafirlerini dağ ve ormanğa barmaqtan vazgeçmesine, furtuna vaqtında deñiz yanında olmamağa çağıra. Şeerde olıp, eski terek ve reklama levhalarına yaqınlaşmamağa, olarnıñ yanında maşina qaldırmamağa tevsiye etile. Elektrik hatlarında ola bilecek qazalar sebebinden elektrikler kesile bile.
