Ukrayına milliy telükesizlik ve mudafaa şurasınıñ kâtibi Oleksiy Danılov «Yaşasın Ukrayına» dep aytqan erkekniñ qurşunğa tizilüv videosını izaatladı.
«Birinciden, bu qaramannıñ soyadı ve adınen bağlı bütün malümat berilüvini beklemelimiz. Ekinciden, bularnıñ ğaddar olğanını isbatlağan daa bir delil, insan ayatı olar içün iç bir şey ola. Tirenip olamağan silâsız insan «Yaşasın Ukrayına» aytqanı içün atıp öldürildi. Bütün sıñırlar yoq etildi. Ayta bilecek tek bir şeyim bar – Ukrayınada böyle qaramanlarnıñ sayısı millionlar ola. millionlarnen qaraman bar. Rusiyeliler azatlıq oğrunda küreşkenimizni añlamay. Bizni tanımay ve añlamaylar», – dedi o, Ukrayına milliy telemarafonınıñ yayınında.
Milliy telükesizlik ve mudafaa şurasınıñ kâtibi elâk olğannıñ şahsiyeti resmiy şekilde tasdıqlanğan soñ onı «devlet tarafından mıtlaqa qayd eterler», dep qoştı.
Martnıñ 6-nda derc etilgen videoda, büyük ihtimalnen, Rusiye arbiyleri «Yaşasın Ukrayına» dep aytqan Ukrayına arbiy urbasında silâsız bir erkekni qurşunğa tize.
Ukrayına Tış işler naziri Dmıtro Kuleba Halqapa ceza mahkemesi prokurorınıñ ofisini adiseni tahqiq etmesine çağırdı.
Ukrayına prezidenti Volodımır Zelenskıy videonı böyle izaatladı: «Bugün peyda olğan videoda işğalciler közlerine baqıp «Yaşasın Ukrayına!» dep cesürliknen aytqan arbiyni canavarca öldürdi. Onıñ sözlerine beraber, birlikte cevap bermemizni isteyim: «Qaramanlar şereflensin! Qaramanlar yaşasın! Yaşasın Ukrayına!» Ve qatillerni tapacaqmız.
Esir alınğan silâsız arbiylerniñ idam videoları daa evel de oldı. Taraflar bir-birini arbiy cinayetlerde qabaatlay. Ukrayına akimiyeti ordusı yapa bilgen cenk cinayetlerini tahqiq etecek, dep vade etken edi. Rusiye akimiyeti Ukrayına arbiyleri öldürilgen videolarını izaatlamadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
