Qurmandaki «Hizb ut-Tahrir» gruppasınıñ üç mabüsi Aqmescit SİZOsından Rusiyeniñ Krasnodar ülkesindeki koloniyağa yanvarniñ 15-nde saba saat 5-te çıqarıldı. Bu aqta Qırım.Aqiqat mühbiri öz menbasına esaslanıp bildire.
Apiske alınğanlarnıñ qoranta dostu Server Kaymakanovnıñ bildirgenine köre, ondan Aqmescit tahqiqat izolâtorında bir şey qabul etmediler. Bu aqta o, «Qırım birdemligi» cemaat birleşmesine bildirdi.
«Bugün Rustem Emiruseinov, Arsen Abhairov, Eskender Abdulganiyevge bir şeyler bermege tırıştım, amma qabul etmediler, bugün SİZO №1-de böyle insanlar yoq dediler. Ketkenler. Qayda – bilmeyim», – dep izaatladı Kaymakanov.
Üç mabüsniñ soñki etap noqtası – Rostov-na-Donu, anda Cenübiy okrugınıñ arbiy mahkemesinde Emiruseinov, Abhairov ve Abdulganiyevniñ mahkemesi olacaq. Nevbetteki oturışuvnıñ keçirilüvi 2020 senesi yanvarniñ 20-ne belgilendi.
Rusiye cezalarnı yerine ketirüv federal hızmeti dava mabüsleriniñ etap etilmesini açıq sürette izaatlamay.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
