Rostov-na-Donu (Rusiye) Cenübiy okrugınıñ arbiy mahkemesi yanvarniñ 29-nda Qurmandaki «Hizb ut-Tahrir davasınıñ» mabüsleri Rustem Emirüseinov, Arsen Abhairov ve Eskender Abdulganiyevniñ davasını temelden baqmağa başladı. Advokat Rustem Kâmilevniñ malümatına köre, davanıñ eki mabüsi şimdi Rostov SİZOsınıñ mahsus blokunda buluna.
Bu aqta o, Qırım.Aqiqat mühbirine ayttı.
«Emirüseinov endi avuştırıldı ve adiy kamerada buluna. Faqat, Abhairov ve Abdulganiyev mahsus blokqa qapatıldı, anda gece-kündüz video nezareti altında qalalar», – dedi advokat.
Onıñ aytqanına köre, Emirüseinov tişi ağırğanını şikâyet ete ve oña kerekli ilâc bermege rica ete, Abhairov ise sırtındaki ağrı sebebinden oturışuvda ayaqta iştirak etip olamadı.
Kelecek mahkeme oturışuvınıñ keçirilüvi 2020 senesi fevralniñ 4-nde beklenile, dep qayd etti advokat.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
