Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» oturışuvında imaye tarafınıñ eki muracaatını red etti.
Bu aqta advokat Edem Semedlâyev Qırım.Aqiqatqa bildirdi. Onıñ aytqanına köre, imaye tarafı mahkemeden qabaatlav qararını Rusiye prokuraturasına qaytarmasını istedi.
«Qabaatlav qararında tam olmağan ibareler pek çoq, meselâ, «belli olmağan vaqıtta» ve «belli olmağan yerde». Yani neden qorçalanacağımız belli degil. Qabaatlav qararında cinayetniñ vaqtı, yeri, işlev usulı qayd etile, mında ise bir şey yoq. Prokuror vesiqanı tamamlasın dep, muracaat berdik, amma mahkeme onı red etti», – dep ayttı imayeci.
Onıñ aytqanına köre, ilk diñlevler qapalı oldı. Dava mabüsleri ve advokatlar Aqmescit SİZOsından video konferentsiyası vastasınen iştirak etti. Kelecek mahkeme 2020 senesi yanvarniñ 20-ne belgilendi.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
