Qurmandaki «Hizb ut-Tahrir davasınıñ» mahkeme oturışuvında mahkeme FSB tahqiqatçıları Sergey Mahnev ve Mihail Lopırevni sorğuğa çekti. Olar mabüslerniñ evlerini tintken edi.
«Qırım birdemligi» bildirgenine köre, eki şaat operativci şaat ve qoranta azalarınen evni baqqanda tintüv vaqtında aşhanede protokolnı toldurdı, dep ayttı.
Advokat Nazim Şeyhmambetov şaat Lopırev cinaiy dava açmaq qararını çıqardımı dep soradı. O, yoq dedi.
«Şaatlarnı (Lopırev – QA) hatırlamay. Saba saat 5-te olarnı qaydan tapqanlar – bilmey, çünki olarnı operativ hadim qıdırdı. Tintüv vaqtında şaat, mütehassıs ve operativciler qayda olğanını bilmey, çünki protokolnı toldurğan edi. Evde ne tapıldı – hatırlamay», – dep aytıla haberde.
Operativ-tahqiqat tedbirleriniñ ketişatınen bağlı çoqusı tafsilâtlarnı şaatlar mahkemede «hatırlamadı», şunıñ içün ne tasdıqlap, ne de red etip oldılar.
Nevbetteki mahkeme oturışuvı oktâbrniñ 19-nda saat 10:30 olacaq. Oktâbrniñ 9-nda kelmegen daa bir şaatnıñ sorğusı ve mahkeme munaqaşalarına keçüv planlaştırıla.
Rostov-na-Donu Cenübiy okrugınıñ arbiy mahkemesi (Rusiye) yanvarniñ 29-nda Qurmandaki «Hizb ut-Tahrir davasınıñ» mabüsleri Rustem Emirüseinov, Arsen Abhairov ve Eskender Abdulganiyevniñ davası temelden baqılıp başlandı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
