Rusiyeniñ ilk tahqiqat organları Qurmandaki «Hizb ut-Tahrir davasınıñ» mabüslerine nisbeten tahqiqat tedbirlerini yekünledi. Bu aqta dava mabüslerinden biri Eskender Abdulganiyevniñ advokat Lilâ Gemeci Qırım.Aqiqat mühbirine bildirdi.
«Qırımdaki Rusiye FSB idaresiniñ tahqiqatçısı tahqiqat tedbirleri yekünlengenini bildirdi. Eñ yaqın vaqıtta dava mabüslerine qarşı cinaiy dava malümatı ögrenilecek. Umumen 6 cılt. Bundan soñ olarnı Rostov-na-Donuğa yollaycaqlar, Cenübiy okrugınıñ arbiy mahkemesinde davanıñ temeli baqılacaq», – dep ayttı Gemeci.
«Asılında terror ücümi olmağanda ve oña azırlıq olmağanda terror taqımında iştirak etüv farqlı fikir ya da baqış içün taqip ola», – dep qoştı o.
Lilâ Gemeci müvekkiliniñ evinde keçirilgen tintüv aqqında tafsilâtlıca tarif etti.
«Eskender Abdulganiyev tutulğan künü evinde tintüv keçirildi, tehnika tutıp alındı, bu afta tahqiqatçı tehnikanıñ bir qısmını, cep telefonı, bilgisayar ve cep defterini qaytardı. Planşet delil olaraq qaldırıldı. Tahqiqatçınıñ planşette ne tapqanını dava malümatlarını ögrengende bilecekmiz. Eskenderniñ edebiyatı da alındı, amma onıñ aytqanına köre, yasaqlanğan bir edebiyatı yoq edi», – dep qayd etti advokat.
Sentâbrniñ 9-nda işğal etilgen Qırımdaki mahkeme Qurmandaki «Hizb ut-Tahrir davasınıñ» mabüslerini daa eki ayğa, 2019 senesi noyabrniñ 13-ne qadar, apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
