Qurman rayonındaki hastahane aprelniñ 26-nda observatsiyağa qapatıldı. Bu aqta Qırım ve Aqyardaki Rospotrebnadzor idaresiniñ reberi Natalya Penkovskaya yañı koronavirus yuqunçına qarşı tedbirler operativ ştabınıñ toplaşuvında bildirdi.
«Qurman hastahanesine veba ile küreş stantsiyasınıñ mütehassısları bardı, mında çalışacaq bölükni quvetleştirdim. 228 hastahane hadimi, 89 tibbiyet hadimi ve 60 hasta observatsiyağa qapatıldı. Kelip ketken hastalar evde tibbiy közetüv altında qalacaq, bugünden başlap observatsiya qararı alındı», – dep bildirdi Penkovskaya.
Qırımda aprelniñ 26-nda daa eki COVID-19 hastası qayd etildi. Hastalar arasında 95 yaşında qadın bar, bulunğan Aluşta şeer hastahanesiniñ terapevtik bölügi qapatıldı.
Umumen Qırımda 69 koronavirus hastası qayd etildi, Aqyarda – 31.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
