Vlasiha (Rusiye) Arbiy istinaf mahkemesi, Qurman «Hizb ut-Tahrir gruppasınıñ» cinayet davası ile bağlı materiallarnı baquvdan çıqardı ve Rostov-na-Donudaki Cenübiy bölgeniñ arbiy mahkemesi mahkemelengenlerge cinayet davanıñ materiallarınen tanışmağa imkân bermegeni içün başlanğıç mahkemege qaytardı.
Aprelniñ 20-nde Moskvada üç mahküm Rustem Emirüseinov, Arsen Abhairov ve Eskender Abdulganiyevniñ ükmüne qarşı mudafaa tarafınıñ istinaf şikâyetleri baqıp başlanmaq kerek edi. Mahkümlerniñ materiallarnen tam şekilde tanışmaq aqqı bar edi, lâkin mahkeme tarafından bu talap yerine ketirilmedi. Bunı «Qırım birdemligi» cemaat birleşmesi advokat Lilâ Gemecige atfı etip bildire.
Bundan ğayrı, mahkeme, mahkemelergenlerge protokollarnen tanış olmaq vazifesini, audio yazısılarınen diksler yollap advokatlarğa qaldırdı. Mudafaa tarafı bu Rusiye ceza ve usul qanunnamesine zıt kele dedi.
«Advokatlarnıñ istese bile tahqiqat tevqifhanesine tehnikanı ketirip, mabüslerni audio yazılarnen tanıştırmağa imkânlarnı yoq», – dedi Gemeci.
Bundan sebep dava Cenübiy bölgeniñ arbiy mahkemesine bozuvlarnı yoq etmek içün qaytarılacaq. İstinaf şikâyetleri ise tek mahkeme oturışınıñ protokolı ögrengen soñ berile bilir.
Bu yıl yanvar ayında Qurmandaki «Hizb ut-Tahrir davası» boyunca üküm etilgen Rustem Emiruseinov, Eskender Abdulganiyev ve Arsen Abhairov Rostov SİZOsından Novoçerkasskqa avuştırlıdı, olarnıñ aytqanına köre, «andaki şaraitler insanlar içün yapılmağan».
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yılğa apiske üküm etti. Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
