Qurman "Hizb ut-Tahrir" davası mabüsleri Qırım garnizon arbiy mahkemesi ögünde yaqınlarınıñ tutulmasını olarğa qarşı tazyıq usulı kibi sayalar.
Bunıñ aqqında "Qırım birdemligi" cemaat birleşmesine advokat Edem Semedlâyev bildirdi.
"Adamlar tuvğanlarına qoltutmaq içün keldiler, bu ana-babalar, ağalar ve tatalar, amma olarğa mahkeme binası yanında turmağa bile izin bermediler, olarnı tuttılar ve polis bölügine alıp kettiler. Ballar bunı olarğa qarşı tazyıq usulı kibi sayalar", - dedi Semedlâyev.
Bugün quvetçiler Rusiyeniñ nezaretinde olğan Qırım garnizon arbiy mahkemesiniñ binası ögünde 21 adamnı tuttı.
Evel, Qurmandaki «Hizb ut-Tahrir davasınıñ» ükmüne qarşı istinaf şikâyetiniñ baqılması başqa künge endi qaldırılğan edi, çünki ükümge qarşı qoşma şikâyeti mabüs Arsen Abhairovğa rusça ve qırımtatarca berilmedi.
Faallerniñ malümatına köre, Rusiye polisi mahkeme ögünde 15 insannı tuttı. Rusiye quvetçileri COVID-19 sebebinden kütleviy tedbirlerniñ keçirilmesi yasaq olğanına esaslandı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
