Rusiye tarafından işğal etilgen Qırımda qurğaqlıq ve anomal sıcaq sebebinden yüzümniñ cıyuvı az oldı, aşayt çeşitleriniñ keyfiyeti bozuldı, dep tarif etti Qırım.Aqiqatqa Qırım agronomı, onıñ adını muarririyet telükesizlik sebeplerinden aytmay.
Bu sene Qırımda yüzüm toplanuvı avgustnıñ üçünci on kününden başlanacaq, amma iyülniñ soñundan başlap tükân ve bazarlarda Qırım yüzüminiñ erte çeşitleri satıla, fiyatı bir kilo 150 rubleden başlana.
"Erte çeşitlerniñ şaraitleri yahşı degil, olar eñ erte baarde yüzümniñ ösüvi vaqtında tabiat-iqlim köstergiçlerinden, soñra iyün-iyül aylarında yağanaqlar olmağanda anomal yüksek sıcaqtan zarar kördi. Umumen alğanda, 2023 senesine baqqanda, 2024 senesiniñ umumiy yüzüm, şu cümleden tehnik çeşitleri, cıyılmasınıñ eksilüvi tahmin etile. Bu şarap sanayısına da menfiy tesir etecek, çünki Qırım şarap sanayısında Qırım yüzüminiñ tehnik çeşitlerine ihtiyac bar", — dep tarif etti Qırım.Aqiqatqa agronom.
Agronom şunı da qayd etti ki, sıcaqnıñ faydası da bar — yaznıñ soñunda ve küzniñ başında bereketniñ şekillenmesi vaqtında yüksek ava arareti ve alçaq suvuqlıq yüzümlerniñ organoleptik ve fizikiy-himiyaviy hususiyetlerine müsbet tesir ete, yani şekerniñ yüksek miqdarını toplamağa yardım ete.
Qırımda devam etken qurğaqlıq sebebinden köy hocalığında zararlar qayd etile. Tek aşlıq tarlaları degil de, yağlı mahsullar, meselâ, künaylan ve keten tarlaları da zarar kördi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
