Qırımtatar faalleri Qurban ve Oraza bayramlarınıñ ilk künlerini Ukrainada resmiy devlet bayramları olaraq tanımağa çağıra, dep bildire «Ukrinform».
Bu teklifni «Ukraina 603,7. Herson «Ukrainanıñ Cenübi – Avropa Tarlası» forumı vaqtında Qırımtatar Milliy Meclisiniñ azası Abmecit Suleymanov seslendirdi.
«Biz Pasha, Troitsanı qayd etemiz, dekabrniñ 25-i aqqında aytamız… Yuqarı Rada Qurban ve Oraza bayramlarınıñ ilk künlerini ne içün bayram künleri dep tanımay?», – dep qayd etti Suleymanov.
Onıñ aytqanına köre, böyle qarar islâm dinini kütken Ukraina vatandaşları içün müsbet bir siyasiy motivatsiya olur edi.
Ukraina prezidenti Volodımır Zelenskıy 2020 senesi iyülniñ 30-nda çıqarğan buyruğınen ükümetke Oraza Bayramı, Qurban Bayramı, Pesah, Roş-ha-Şan, Hanuka, Pasha bayramları olğan diniy bir sıra bayramğa devlet statusını berüv meselesini baqmağa vazife berdi.
Buyruqta qayd etilgenine köre, teklif «din kütken bütün vatandaşlarnıñ anayasa aqlarını ve serbestligini temin etüv, teñ aq ve imkânlarınıñ yerine ketirilmesi, çoq milletli ve çoq dinli Ukraina cemiyetiniñ tarihı, medeniyeti, ananeleriniñ şerefini qutlamaq maqsadınen» berildi.
Daa evel Zelenskıy Qurban ve Oraza bayramlarına devlet diniy bayramları statusını berecek fermannı imzalamağa niyetlene, dep bildirgen edi.
Qurban bayram – musulmanlarnıñ büyük bayramlarından biridir, acılıq bitkeniniñ alâmeti ola. Oraza bayramından 70 künden soñ qayd etile.
