18 yılğa azatlıqtan marum etilgen 59 yaşındaki Ruslan Mesutovnı Rusiyeniñ Yakutiya vilâyetindeki 1-inci ceza izolâtorına etap ettiler. Bu aqta "Qırım birdemligi" onıñ qız qardaşı Lilâ Mesutovağa atıf etip bildire.
Onıñ aytqanına köre, Mesutov Rusiye Federatsiyasınıñ Lipetsk vilâyetindeki Yelts apishanesinden çıqarğanda, etapnıñ soñki yeri aqqında haberdar etilmegen edi eken. Novorossiyskke ketken siyasiy mabüs, onı Yakutiyağa alıp ketkenlerini mektüpte bildirgen.
"Bu qadar hastalığı olğan adamnı coğrafiyanıñ soñuna yollamaq!.. Bu bizim içün şok edi", — dep ayttı Mesutova.
Koloniyağa kelgen soñ, Mesutovnı ŞİZO-ğa yerleştirgenler. Onıñ bütün şahsiy eşyaları, şu cümleden Quran ve közlükleri alınğan. Lilâ Mesutovanıñ aytqanına köre, etapanıñ arfesinde apishanede Mesutovnıñ eşyalarını hırsızladılar, bunıñ içün Yakutiya yolundaki tranzit noqtalarında lâqayt qalmağan mabüsler onı kiyindirgenler, çaresine köre oña yardım etkenler.
"Nezaretçiler, musulmannı ŞİZO-ğa "uzun müddetke" yerleştirgenlerini ve onıñ "tükândan ve körüşüvlerden" faydalanmağa aqqı olmağanını bildirdiler", — dep qayd etti onıñ tatası.
"O, ŞİZOda bulunğan vaqıtta, mektüpler yaza bile", — dep qoştı o.
Siyasiy mabüs sağlıq vaziyeti aqqında mektüplerde yazmay. Terapevtni çağırmağa rica etken, amma ekimniñ ziyareti aqqında şimdilik haber etmegen. Mesutovanıñ aytqanına köre, Yeltsteki apishanede keçken körüşüvde onıñ ağasınıñ qan basımı yüksek olğanını bilgen.
"Onıñ alı pek yaramay edi: qan basımı 200-ge, bazıda 250-den 150-ge köterile edi. Biz oña Qırımdan pek küçlü ilâclarnı ketirdik, olarnı oña [apishaneniñ] sanitar bölüginde yazıp berdiler. Ekimler gipertoniya diagnozını qoydılar. Apishanede oña belini bağlamağa da yazıp berdiler, amma cezahanede onı da alıp taşladılar", — dep bildirdi Mesutova.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
