Aqmescitte Salğır özeniniñ yatağında qurğaqlıq sebebinden suv qalıp başladı, «ösümlikler çoq» oldı. Bu aqta Rusiye kontrolindeki memuriyetniñ şeer hocalığı departamentiniñ yolbaşçısı Yaqub Zeytulayev «Krıminform» akimiyet tarafdarı Qırım haber resursına bildirdi.
«Suv anbarında suv az olğanı içün baqa yipek tez ve bol peyda olıp başladı, sanitar suv özenge tüşürilmey. Suv qala, ve çeçeklene», – dep ayttı Zeytulayev.
Onıñ bildirgenine köre, bu sebepten yalı kenarını ve özen yatağını temizlemek içün cedvelni tüzetmege qarar alındı.
«Aftada beş kere «Gorod» müessisesiniñ hadimleri yalı kenarından çöplük qutularını temizley, aftada üç kere yalı kenarındaki çöplük temizlene, ayda eki-üç kere yataq ösümliklerden temizlenecek», – dep qoştı Zeytulayev.
Rusiye kontrolindeki Qırım yolbaşçısı Sergey Aksenov, 2020 senesi 150 yıl içinde eñ quru oldı, dep bildire.
Soñki ayda Qırımnıñ suv anbarlarınıñ tolması 7,1 mln kubometr az oldı, dep qabul etti Suv hocalığı devlet komiteti.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
