Qırım uquq qoruyıcı gruppası BMT mustaqil komissiyasına Rusiye quvetçileri tarafından Ukrayinanıñ işğal etilgen territoriyalarından Qırımğa alıp ketilgen eñ az 53 insan aqqında malümat berdi.
Bu aqta Qırım uquq qoruyıcı gruppasınıñ başı Olğa Skrıpnık "Hırsızlav, işkence, taqip: 2023 senesi işğal etilgen Qırımda neler oldı" matbuat konferentsiyası vaqtında bildirdi.
''2023 senesiniñ soñunda biz Birleşken Milletler Teşkilâtınıñ mustaqil komissiyasına eñ az 53 insan hırsızlanıp, Cenüpten Qırımğa ketirilgeni aqqında malümat berdik. Amma qayd etecem ki, bu tek bir qısmıdır. Aqiqatta bu insanlar daa çoq", - dep bildirdi Skrıpnık.
Onıñ qayd etkenine köre, Ukrayinanıñ cenübinde qaçırılğan insanlarnıñ çoqusını Rusiye Qırımğa alıp kete, bunıñnen bağlı olaraq Aqmescitte eki yıllıq cenk vaqtında eki yañı tahqiqat izolâtorı açıldı.
Bundan da ğayrı,Qırım uquq qoruyıcı gruppasınıñ malümatına köre, yüzden ziyade ukrayin Qırımda inkommunikado statusında buluna - Rusiye quvetçileri olarnıñ tutulğanını tasdıqlamay ve olarnen bağ yoq.
Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva, Qırım.Aqiqatnıñ 2023 senesindeki işi neticelerine bağışlanğan brifingde, 2023 senesi dekabr ayınıñ soñuna qadar Qırım sakinlerine nisbeten siyasiy sebeplerden azatlıqtan marum etüvniñ 191 adisesi qayd etilgenini bildirdi, olardan 123 - qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
