Qırımtatar resurs merkezi içtimaiy ağlarda İşğalge qarşılıq Kününe bağışlanğan "Qırım işğalden azat etilgence, qarşılıq devam etecek" aktsiyasını başlattı.
"Dünyağa hatırlatmaq isteymiz ki, işğal — keçmiş degil, bu bizim bugümiz, ve esirlikte olğan er kün — Qırımda qalğanlar içün, tuvğan evini terk etmege mecbur olğanlar içün bir sınavdır. 2014 senesinden berli Ukrayina qarşılıq köstere. Bu tirenüv toqtamay, çünki Qırım — Ukrayinadır. Biñlernen insan vazgeçmey, susmay, aqiqat, kimlik, azatlıq içün küreş devam ete. Biz bu sesni destekleymiz, çünki o, söz aqqından marum etilgen er kes içün seslene", — dep aytıla beyanatta.
Aq qorçalayıcılar lâqayt olmağan er kesni bu aktsiyağa qoşulmağa çağırdı: içtimaiy ağlardaki saifelerinde #LIBERATECRIMEA heştegi ile levhalardan birini tarqatmaq.
Qırımnıñ işğaline qarşılıq künü fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçken edi. Aktsiya Rusiye işğaline qarşılıq kösterüvniñ esas epizodlarından biri oldı.
2020 senesi Ukrayina prezidenti fevralniñ 26-nı Qırım Muhtar Cumhuriyeti ve Aqyar şeeriniñ işğaline qarşılıq kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
