Link açıqlığı

Saatnıñ esas haberi

QRM: 2024 senesi Qırımda 29 para cezası qayd etildi, olarnıñ umumiy miqdarı 1,5 milion rubleden çoq


Tasviriy resim
Tasviriy resim

2024 senesi işğal etilgen Qırımda eñ azından 29 para cezası berildi, 13-ü qırımtatarlarğa qarşı. Cezalarnıñ umumiy miqdarı 1 581 500 rubleni teşkil ete, dep haber ete Qırımtatar resurs merkezi.

Onıñ malümatına köre, 2023 senesiniñ aynı devrinde 46 para cezası qayd etildi, 2022 senesinde ise - 40.

2024 senesi eñ çoq "Rusiye Silâlı quvetleriniñ itibardan tüşürüvi", "akimiyetke sayğısızlıq", "içtimaiy ağlarda Ukrayina aqqında añma ve Rusiye akimiyetini tenqit etüv" qabaatlavları ile para cezasını aldılar.

QRM eñ çoq seslenilgen adiseler arasında aşağıdaki cezalarnı qayd ete:

  • "Qırım" gazetiniñ baş muarriri Bekir Mamutov "Rusiye Federatsiyasınıñ ordusını ayıplağanı" içün 4 biñ ve 100 biñ ruble aldı.
  • "Qırım" gazetiniñ tesisçisi Seyran İbragimov 250 biñ ruble aldı.
  • Saq rayonınıñ sakini RF Silâlı quvetleriniñ itibarını tüşürgeni içün 40 biñ rublege maküm etildi.
  • 77 yaşındaki Aqyar sakini Rusiye ordusını tenqit etkeni içün 50 biñ ruble para cezasını aldı.
  • Qırımlı studentni Rusiye prezidentini aqaretlegen video içün 50 biñ rublege cezaladılar.
  • Kezlev sakini içtimaiy ağlarda Rusiye akimiyetini tenqit etken yazıları içün 40 biñ ruble aldı.
  • "Eski Qırım" Mustaqil musulman cemiyeti yasaq etilgen edebiyatnı saqlağanı içün 100 biñ ruble para cezasını aldı.

Rusiye makemeleri, içtimaiy ağlarda üç trezub resimi, Facebook ve Instagram logotipleri ile etiketler, Hersonnıñ azat etilüvi aqqında yazılar içün para cezalarını da belgiledi.

Daa evel QRM haber etkenine köre, 2014 senesinden başlap, "Noman Çelebicihan" qırımtatar batalyonında iştirak etkeninde qabaatlanıp, eñ azından 51 insan yaqalandı.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG