Şaatlar Qara deñizdeki Keriç boğazınıñ kirişinde gemi yanğanını bildire, dep haber ete Keriç kütleviy haber vastaları.
«Kerç FM» saytınıñ malümatına köre, yanğın geminiñ suv üstü qısmını qavrap aldı.
Şaatlarnıñ aytqanına köre, adise yerine reydde turğan bir qaç gemi keldi.
«Tanker Opuk burnunıñ cenübinde yana. Yanında «Nasiba Zeynalova», «İstra», «Dmitriy Pokrovskiy», «VF Tanker – 5», «Sinerci 1» gemileri buluna. 13 süratınen olarğa «Spasatel Demidov» kete», – dep aytıla haberde.
Keriç saytı gemilerden biriniñ vahta matrosınıñ aytqanlarını tekrarlay, o, eki gemi yükni yükley edi, dep bildire.
«Olardan biri, tahminlerge köre, «Maestro», gaz taşıy. Bir gemide patlay oldı, yanında olğan gemi yanmağa başladı. Şimdi ekisi yana. İnsanlarnı qorçalaylar. Qorqunç bir şey», – dedi matros.
Al-azırda işğal etilgen Qırım ve qomşu Rusiyede bu malümatnı isbatlamaylar.
Bundan evel VOLGO BALT 214 yük gemisi Qara deñizde Türkiye yalısında battı, dep bildirilgen edi. Ekspertlerniñ aytqanına köre, 2014-2015 seneleri bu gemi işğal altındaki Qırımnıñ limanlarına kirgen edi.
2018 senesi küzde Afrika yük gemisi (Lome limanına ait, Togo cumhuriyeti) Qırım yalısında zarar kördi.
Sentâbrniñ 1-nden 30-na qadar 16 tanker ve yük gemisiniñ Qırım limanlarına kirgeni qayd etilgen edi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
