Qırım Muhtar Cumhuriyeti musulmanları diniy idaresiniñ müftisi Ayder Rustemovnıñ fikirince, Qırım musulmanları Rusiye qurultayınıñ «delegatları» Emirali Ablayevni «Qırım musulmanlarınıñ müftisi» olaraq «saylamadı, tayin etti». Böyle bir fikirni Rustemov Qırım.Aqiqatqa bildirdi.
«İşğal etilgen Qırımda saylavlar olmay. Bu topraq işğal etildi. Anda insanlar fikirlerini serbest ifade etip olamaylar. «Saylavlarnı» keçirgen qurulış işğalci akimiyet ve FSB tarafından kontrol etile. Olar onı dünya toplulığı içün qullana: baqıñız, qırımtatarlarnıñ diniy idaresi biznen beraber, dep kösterecek olalar», – dep tüşüne Rustemov.
Onıñ aytqanına köre, Qırım musulmanlarınıñ yekâne diniy idaresi «bar, çalışa ve esas Ukrainada faaliyet köstere ve başqa imkânı yoq».
Aqmescitte olıp keçken Qırım musulmanlarınıñ Rusiye qurultayı delegatları yarımada «musulmanlarınıñ yañı reisi» olaraq Emirali Ablayevni sayladı.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
